ଏମ୍ସରେ ଏମଆରଆଇ ମେସିନ ଅଚଳ, ରୋଗୀ ଖର୍ଚ୍ଚାନ୍ତ ଓ ହନ୍ତସନ୍ତ
ଏମ୍ସରେ ଏମଆରଆଇ ମେସିନ ଅଚଳ, ରୋଗୀ ଖର୍ଚ୍ଚାନ୍ତ ଓ ହନ୍ତସନ୍ତ
admin
4611
ଭୁବନେଶ୍ୱର : ସମ୍ପ୍ରତି ଲକଡାଉନ ପାଇଁ ଗରିବ ଖଟିଖିଆମାନେ ହାତବାନ୍ଧି ବସିଛନ୍ତି । ନାଁ କାମକୁ ଯାଇପାରୁଛନ୍ତି ନା ଦି ପଇସା ରୋଜଗାର କରିପାରୁଛନ୍ତି । ହେଲେ ଏଭଳି ଅସୁବିଧା ସମୟରେ ବୋଝ ଉପରେ କୋରଡ଼ା ମାଡ଼ କରିଛି ସରକାରୀ ହସପିଟାଲ । ପୁଣି ଯାହିତାହି ହସପିଟାଲ ନୁହେଁ ଦେଶର ପ୍ରସିଦ୍ଧ ଏମ୍ସ ହସପିଟାଲ ଏବେ ରୋଗୀଙ୍କ ଉପରେ କୋରଡ଼ା ମାଡ଼ କରିଛି । ଭୁବନେଶ୍ୱର ଏମ୍ସରେ ଅଚଳ ହୋଇପଡ଼ିଛି ଏମଆରଆଇ ମେସିନ । ଫଳରେ ରୋଗୀମାନେ ସରକାରୀ ସ୍ୱାସ୍ଥ୍ୟ କାଡର଼୍ରେ ମାଗଣାରେ ଏମଆରଆଇ ପରୀକ୍ଷା କରିପାରୁନାହାନ୍ତି । ଗୋଟିଏ ପଟେ ରୋଜଗାର ନଥିବାବେଳେ ଅପରପକ୍ଷରେ ଏଭଳି ପରୀକ୍ଷା ପାଇଁ ହଜାର ହଜାର ଟଙ୍କାର ବୋଝ ମୁଣ୍ଡାଇବାକୁ ପଡ଼ୁଛି ।
ଭାତ ହାଣ୍ଡିରୁ ଗୋଟିଏ ଚିପିଲା ଭଳି ଉଦାହରଣ ଭାବେ ନିରଂଜନ ବିଶ୍ୱାଳଙ୍କୁ ନିଆଯାଇପାରେ । ବାଙ୍କୋଇ ରାମଚନ୍ଦ୍ରପୁରରୁ ନିରଂଜନ ନିଜର ସ୍ୱାସ୍ଥ୍ୟ ପରୀକ୍ଷା ପାଇଁ ଏମ୍ସ ଆସିଥିଲେ । ଡାକ୍ତର ପରୀକ୍ଷା ନୀରିକ୍ଷା କରିବା ପରେ ଏମଆରଆଇ କରିବା ପାଇଁ ପରାମର୍ଶ ଦେଇଥିଲେ । ବିଜୁ କୃଷକ କଲ୍ୟାଣ ଯୋଜନାର କାଡର଼୍ ଥିବାରୁ ମାଗଣାରେ ଏମ୍ସରେ ଏମଆରଆଇ ପରୀକ୍ଷା କରିବେ ବୋଲି ଭାବିଥିଲେ ନିରଂଜନ । କିନ୍ତୁ ଏମ୍ସରେ ଏମଆରଆଇ ମେସିନ ଅଚଳ ଅଛି, ବାହାରେ ପରୀକ୍ଷା କରିଦିଅ ବୋଲି ତାଙ୍କୁ ଉତର ମିଳିଥିଲା । ଫଳରେ ବାଧ୍ୟହୋଇ ସେ ବେସରକାରୀ ନିଦାନ କେନ୍ଦ୍ରରେ ୬ ହଜାର ଟଙ୍କା ଦେଇ ପରୀକ୍ଷା କରିବାକୁ ବାଧ୍ୟ ହୋଇଥିଲେ । ଏଭଳି ଘଡ଼ିସନ୍ଧି ସମୟରେ ଯଦି ସରକାରୀ କଳ ଅଚଳ ହୋଇପଡେ଼ ତେବେ ସାଧାରଣ ଲୋକଟେ କ’ଣ କରିବ ସେନେଇ ପ୍ରଶ୍ନବାଚୀ ଉଠିଛି । ତୁରନ୍ତ ଏମ୍ସର ଏମଆରଆଇ ମେସିନ ସଚଳ କରିବାକୁ ଦାବି ହେଉଛି ।
