ବିନା ନିମନ୍ତ୍ରଣରେ ଭୋଜି ଖାଇବାକୁ ଯାଇ, ଖାଇଲେ ନିର୍ଧୂମ ଛେଚା ।
ବିନା ନିମନ୍ତ୍ରଣରେ ଭୋଜି ଖାଇବାକୁ ଯାଇ, ଖାଇଲେ ନିର୍ଧୂମ ଛେଚା ।
admin
4372
ବୁଗୁଡ଼ା : ମଦ ନିଶାରେ ଓ ବିନା ନିମନ୍ତ୍ରଣରେ ବିବାହ ଭୋଜିକୁ ଆସିଲେ । ଆଉ ମଞ୍ଚ ଉପରେ ଚଢ଼ିଯାଇ ନବଦମ୍ପତିଙ୍କ ସହ ସେଲଫି ନେବାକୁ ଚେଷ୍ଟା କରିବା ସହ କନ୍ୟା ବେକରେ ହାତ ପକାଇ ସୁନାହାର ଲୁଟିବାକୁ ଯୋଜନା କଲେ । ହେଲେ ସଂପର୍କୀୟ ଓ ଗ୍ରାମବାସୀଙ୍କଠୁ ଖାଇଲେ ନିର୍ଧୂମ ଛେଚା । ଗଞ୍ଜାମ ଜିଲ୍ଲା ବୁଗୁଡ଼ା ସହର ବାଲିପିଣ୍ଡି ସାହିରେ ଏଭଳି ଏକ ଘଟଣା ଆଜି ଚର୍ଚ୍ଚାର ବିଷୟ ହୋଇଛି । ବୁଗୁଡ଼ା ପୁଲିସ ତିନିଜଣ ଯୁବକ ମୋଟାବାଡ଼ି ପଞ୍ଚାୟତ ଅଧୀନ ନାଗିରି ଗ୍ରାମର ଜିତେନ୍ଦ୍ର ପ୍ରଧାନ, ସମୀର ପ୍ରଧାନ ଓ ଟୁଟୁ ପ୍ରଧାନକୁ ଅଟକ ରଖି ପଚରାଉଚରା କରୁଛି ।
ସୂଚନାନୁସାରେ, ବାଲିପିଣ୍ଡି ସାହିର ଭଗବାନ ନାୟକଙ୍କ ପୁଅ ଚିତ୍ରସେନଙ୍କ ବିବାହ ସରିବା ପରେ ରାତିରେ ଷ୍ଟାଡିୟମ ପରିସରରେ ରିସେପସନ ଭୋଜି ଆୟୋଜିତ ହୋଇଥିଲା । ମଞ୍ଚ ଉପରେ ନବଦମ୍ପତି ବସିଥିବା ବେଳେ ଭୋଜି ଚାଲିଥିବାରୁ ସଂପର୍କୀୟ ଓ ଅଞ୍ଚଳବାସୀଙ୍କ ଭିଡ଼ ଜମିଥିଲା । ଭିଡ଼ର ସୁଯୋଗ ଦେଇ ବିନା ନିମନ୍ତ୍ରଣରେ ଜିତେନ୍ଦ୍ର, ସମୀର ଓ ଟୁଟୁ ଭିତରେ ପଶି ଯାଇଥିଲେ । ଭୋଜି ଖାଇ ସେଠାରୁ ସେମାନେ ବର୍ତ୍ତି ଯାଇପାରନ୍ତେ । ହେଲେ ମଦନିଶାରେ ସେମାନେ ଭିଡ଼ର ସୁଯୋଗ ନେଇ ନବଦମ୍ପତି ବସିଥିବା ମଞ୍ଚ ଉପରକୁ ଚଢ଼ିଯାଇଥିଲେ । ଆଉ ସେଲଫି ନେବା ବାହାନାରେ କନ୍ୟାର ବେକରୁ ସୁନାହାର ଲୁଟିବାକୁ ଚେଷ୍ଟା କରୁଥିବା ଦେଖି ସନ୍ଦେହ ଜାତ ହୋଇଥିଲା । ଉପସ୍ଥିତ ସଂପର୍କୀୟ ସେମାନଙ୍କୁ ଗୁଡ଼େଇତୁଡ଼େଇ ବିଭିନ୍ନ ପ୍ରଶ୍ନ ପଚାରିବାରୁ ସେମାନେ କୌଣସି ସନ୍ତୋଷଜନକ ଉତ୍ତର ଦେଇପାରିନଥିଲେ । ଉତ୍ତ୍ୟକ୍ତ ହୋଇ ଲୋକେ ତିନି ଯୁବକଙ୍କୁ ନିର୍ଧୂମ ମାଡ଼ ମାରିଥିଲେ । ଆଉ ରାତି ସାଢ଼େ ୧୧ଟାରେ ପୁଲିସ ପହଞ୍ଚି ଉତ୍ତ୍ୟକ୍ତ ଲୋକଙ୍କ କବଳରୁ ସେମାନଙ୍କୁ ଉଦ୍ଧାର କରି ଥାନାକୁ ଆଣିଥିଲା । ଏହି ଘଟଣା ସମଗ୍ର ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
