ମେ’ରୁ ହୋଇପାରେ ଖରାଛୁଟି!
ମେ’ରୁ ହୋଇପାରେ ଖରାଛୁଟି!
admin
ସ୍ପଷ୍ଟଭୁବନେଶ୍ୱର : ମେ’ରୁ ହୋଇପାରେ ଖରାଛୁଟି। ଧିରେଧିରେ ଏହା ସ୍ପଷ୍ଟ ହେବାରେ ଲାଗିଛି । ସରକାରଙ୍କ ପକ୍ଷରୁ ଏନେଇ ବିଧିବଦ୍ଧ ଭାବେ ନିଷ୍ପତ୍ତି ନିଆଯାଇ ନଥିବାବେଳେ କେତେକ ସ୍କୁଲ ମେ’ରୁ ଖରାଛୁଟି କରିବା ପାଇଁ ଘୋଷଣା କରିସାରିଛନ୍ତି । ରାଜଧାନୀର ଏକ ଘରୋଇ ସ୍କୁଲ ପୂର୍ବ ବର୍ଷଗୁଡ଼ିକ ଭଳି ମେ’ ୨ରୁ ଜୁନ ୨୦ ପର୍ୟ୍ୟନ୍ତ ସ୍କୁଲ ବନ୍ଦ ରହିବ ବୋଲି ନୋଟିସ ମଧ୍ୟ ଦେଇସାରିଛି ।
ସମ୍ପ୍ରତ୍ତି ପ୍ରବଳ ଗ୍ରୀଷ୍ମପ୍ରବାହ ଯୋଗୁଁ ସ୍କୁଲଗୁଡ଼ିକୁ ବନ୍ଦ ରଖାଯାଇଛି । ଅପ୍ରେଲ ୨୬ରୁ ମେ’ ୩୦ ପର୍ୟ୍ୟନ୍ତ ସ୍କୁଲ ବନ୍ଦ ରହିଥିବାବେଳେ ମେ’ର ସ୍ଥିତି ଦେଖି ପରବର୍ତ୍ତୀ ନିଷ୍ପତ୍ତି ନିଆଯିବ ବୋଲି ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ କୁହାଯାଇଛି । ତେବେ ପିଲା ନଆସିଲେ ମଧ୍ୟ ଶିକ୍ଷକ ଶିକ୍ଷୟିତ୍ରୀମାନେ ସ୍କୁଲ ଆସିବେ ଏବଂ ଦଶମ ଓ ଦ୍ୱାଦଶ ପରୀକ୍ଷା ଜାରି ରହିବ ବୋଲି ବିଭାଗ ପକ୍ଷରୁ ସ୍ପଷ୍ଟ କରାଯାଇଛି ।
ପ୍ରବଳ ଖରାରେ ଏବେ ଦିନ ୯ଟା ପରେ ଘରୁ ବାହାରିବା ମୁସ୍କିଲ ହୋଇପଡୁଛି । ପଦାକୁ ବାହାରିଲେ ଆକାଶରୁ ଅଗ୍ନି ବର୍ଷା ହେବାଭଳି ପ୍ରତୀୟମାନ ହେଉଛି । କିନ୍ତୁ ଖରା ହେଉଥିଲେବି ଚଳତି ବର୍ଷ ଖରାଛୁଟି ହ୍ରାସ କରିବାକୁ ସରକାର ଘୋଷଣା କରିଥିଲେ । ଉଚ୍ଚଶିକ୍ଷା ବିଭାଗ ପକ୍ଷରୁ ଜୁନ ୧ରୁ ଜୁନ ୧୬ ପର୍ୟ୍ୟନ୍ତ ଓ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ଜୁନ ୧୦ରୁ ଜୁନ ୧୬ ପର୍ୟ୍ୟନ୍ତ ଖରାଛୁଟି ଘୋଷଣା କରାଯାଇଥିଲା । କରୋନା ଯୋଗୁଁ ଗତ ଦୁଇବର୍ଷ ଧରି ପାଠପଢ଼ା ବ୍ୟାହତ ହୋଇଥିବାରୁ ଏତାଦୃଶ ନିଷ୍ପତ୍ତି ନିଆଯାଇଥିଲା । କିନ୍ତୁ ଏଭଳି ନିଷ୍ପତ୍ତିକୁ ଅଭିଭାବକ ଓ ବୁଦ୍ଧିଜୀବୀମାନେ ବିରୋଧ କରିଥିଲେ । ମେ’ରେ ଖରା ହେଉଥିବାବେଳେ ଜୁନରେ କାହିଁକି ଛୁଟି ଦିଆଯିବ ବୋଲି ପ୍ରଶ୍ନ ଉଠିଥିଲା । ଏମିତିକି ଜୁନରେ ସ୍କୁଲ ଖୋଲା ରଖି ମେ’ରେ ଛୁଟିଦେବାକୁ ଶିକ୍ଷକମାନେ ମଧ୍ୟ ଦାବି କରିଥିଲେ । ତେବେ ସେ ଯାହାହେଉନା କାହିଁକି ତାତି କମିବାର ସମ୍ଭାବନା ନଥିବାରୁ ମେ’ରୁ ହିଁ ଖରାଛୁଟି ହେବବୋଲି କୁହାଯାଉଛି ।
