ହାଜତ ଭିତରେ ଥାର୍ଡ ଡିଗ୍ରୀ, ୫ ଅଭିଯୁକ୍ତ ଗୁରୁତର, କଟକ ସ୍ଥାନାନ୍ତର
ହାଜତ ଭିତରେ ଥାର୍ଡ ଡିଗ୍ରୀ, ୫ ଅଭିଯୁକ୍ତ ଗୁରୁତର, କଟକ ସ୍ଥାନାନ୍ତର
admin
5848
ପୁରୀ: ପୁରୀରୁ ଆଉ ଏକ ଲୋମଟାଙ୍କୁରା ଘଟଣା ସାମ୍ନାକୁ ଆସିଛି । ହାଜତ ଭିତରେ ପୁଲିସର ଥାର୍ଡଡିଗ୍ରୀରେ ୫ ଜଣ ଅଭିଯୁକ୍ତ ଗୁରୁତର ହୋଇପଡ଼ିଛନ୍ତି । ବିଶେଷ ସୂତ୍ରରୁ ଜଣାପଡ଼ିଛି ଯେ, ପୁଲିସ ସେମାନଙ୍କୁ ୭ ଦିନ ଧରି ନିର୍ଘାତ ପିଟି ଚାଲିଥିଲା । ଫଳରେ ସେମାନଙ୍କ ନୋଳା ବସି ମାଂସ ପଚି ଯାଇଥିବା ବେଳେ ମଳଦ୍ୱାରରେ ଗଭୀର କ୍ଷତ ହୋଇଛି । ବାସେଳୀ ସାହି ଥାନାରେ ହାଜତ ମୃତୁ୍ୟ ଘଟଣାରେ ସାରା ରାଜ୍ୟରେ ତୁମ୍ବି ତୋଫାନ ହେବା ପରେ ପୁଲିସ ମନରେ ଛନକା ପଶିବାରୁ ସେମାନଙ୍କୁ କୋର୍ଟ ଚାଲାଣ କରିଥିଲା । ଏହା ପରେ ସେମାନଙ୍କୁ ନିମାପଡ଼ା ଜେଲକୁ ପଠାଇ ଦିଆଯାଇଥିଲା । ସେମାନଙ୍କର ଅବସ୍ଥା ଦେଖି ଜେଲ କର୍ତ୍ତୃପକ୍ଷ ବି ଫେରାଇ ଦେଇଛନ୍ତି । ଏହା ପରେ ସେମାନଙ୍କୁ କଟକ ବଡ଼ ମେଡିକାଲ (ଏସସିବି)କୁ ସ୍ଥାନାନ୍ତର କରାଯାଇଛି । ଏସସିବି ପକ୍ଷରୁ ଏ ନେଇ କୌଣସି ସ୍ପଷ୍ଟ ସୂଚନା ମିଳିନାହିଁ । ତେବେ ଏହି ଘଟଣାରେ ଅଭିଯୁକ୍ତଙ୍କ ପ୍ରତି ପୁରୀ ପୁଲିସ ନିର୍ମମ ଆଚରଣ ସବୁ ସୀମା ସରହତ ଟପି ଯାଇଥିବା କୁହାଯାଉଛି । ଗତକାଲି ପୁରୀର ବାସେଳୀ ସାହି ଥାନାରେ କେ.ରମେଶଙ୍କୀ ପୁଲିସ ବାଡେଇ ବାଡେଇ ମାରିଥିବା ଘଟଣାକୁ ନେଇ ସାରା ରାଜ୍ୟରେ ହୋ’ହଲ୍ଲା ସହ ତୀବ୍ର ପ୍ରତିକି୍ରୟା ଲାଗି ରହିଛି । ଏହିଭଳି ଅବସ୍ଥାରେ ଥାର୍ଡଡିଗ୍ରୀ ଯୋଗୁ ୫ ଜଣ ଗୁରୁତର ହେବା ଘଟଣା ଆହୁରି ଚାଞ୍ଚଲ୍ୟ ସୃଷ୍ଟି କରିଛି । ପୁଲିସର ଆଚରଣ ପ୍ରତି ପ୍ରଶ୍ନ ଉଠିଛି ।
