ଭୁବନେଶ୍ୱରରେ ପହଞ୍ଚିଲା ଟିକା କୋଭାକ୍ସିନ
ଭୁବନେଶ୍ୱରରେ ପହଞ୍ଚିଲା ଟିକା କୋଭାକ୍ସିନ
admin
3785
ଭୁବନେଶ୍ୱର : ଆସନ୍ତା ୧୬ରୁ କରୋନା ଟୀକାକରଣ ଆରମ୍ଭ କରାଯିବ । ଗତକାଲି ଅପରାହ୍ନରେ କୋଭିସିଲଡ଼ ଟିକା ରାଜ୍ୟରେ ପହଁଚିଥିଲା । ଏହାକୁ ରାଜ୍ୟ ଟିକା କେନ୍ଦ୍ରରେ ରଖାଯାଇଛି । ତେବେ ଆଜି ପ୍ରାୟ ୨୦ ହଜାର ଡୋଜର କୋଭାକ୍ସିନ ପହଁଚିଛି । କୋଭିସିଲଡ଼ ପରେ କୋଭାକ୍ସିନ ରାଜ୍ୟରେ ପହଁଚି ସାରିଛି । ଅପରପକ୍ଷରେ ଟିକାକରଣ ପାଇଁ ସମସ୍ତ ପ୍ରକାର ପ୍ରାକ ପ୍ରସ୍ତୁତି ଶେଷ ହୋଇଛି ।
ଓଡ଼ିଶାରେ ପ୍ରଥମେ ବୟସ୍କ ସ୍ୱାସ୍ଥ୍ୟକର୍ମୀଙ୍କୁ କରୋନା ଟିକା ପ୍ରଦାନ କରାଯିବ । ଗତକାଲି ଏନେଇ ଅତିରିକ୍ତ ମୁଖ୍ୟ ସଚିବ ପ୍ରଦୀପ୍ତ ମହାପାତ୍ର ସୂଚନା ଦେଇଥିଲେ । ପୁଣେରୁ ଭୁବନେଶ୍ୱରକୁ ସ୍ୱତନ୍ତ୍ର ସ୍ପାଇସ ଜେଟ ବିମାନରେ କୋଭିସିଲଡ଼ ଟିକା ଆସିଥିଲା । ଆଜିଠାରୁ ବିଭିନ୍ନ ଜିଲ୍ଲାଗୁଡ଼ିକୁ ଟିକା ପଠାଇବାର ବ୍ୟବସ୍ଥା କରାଯାଇଛି । ପୂର୍ବରୁ ରାଜ୍ୟର ସମସ୍ତ ଜିଲ୍ଲାରେ ଡ୍ରାଏ ରନ ବି ଶେଷ ହୋଇଛି ।
ଆସନ୍ତା ୧୬ରୁ ସାରା ଦେଶରେ କରୋନା ଟିକାକରଣ ଆରମ୍ଭ ହେବ । ପୁଣେ ଅନ୍ତର୍ଜାତୀୟ ବିମାନ ବନ୍ଦରରୁ ୧୩ଟି ସହରକୁ ଟିକା ବିତରଣ ଆରମ୍ଭ ହୋଇଛି । ପ୍ରଥମ ଦଫାରେ ୧୩ଟି ସହରକୁ ୫୬.୫ ଲକ୍ଷ ଡୋଜର ଟିକା ପଠାଯାଇଛି ।
ସେରମ ଇନଷ୍ଟିଚୁ୍ୟଟ ଅଫ ଇଣ୍ଡିଆ ଠାରୁ କେନ୍ଦ୍ର ସରକାର ୧୧୦ ଲକ୍ଷ ଡୋଜର କୋଭିସିଲଡ଼ ଟିକା ଆଣିବେ । ଯାହାର ପ୍ରତି ଡୋଜ ପିଛା ମୂଲ୍ୟ ୨୦୦ ଟଙ୍କା ରହିଛି । ସେହିପରି ଭାରତ ବାୟୋଟେକ ଠାରୁ ୫୫ ଲକ୍ଷ କୋଭାକ୍ସିନ କିଣାଯିବ । ତେବେ କୋଭାକ୍ସିନ ପ୍ରାୟ ୧୬.୫ ଲକ୍ଷ ଡୋଜ ମାଗଣାରେ ଦେବ । ଯାହାର ପ୍ରତି ଡୋଜର ମୂଲ୍ୟ ୨୯୫ ଟଙ୍କା ରହିଛି । ଏଯାଏଁ ୫୪ ଲକ୍ଷ ୭୨ ହଜାର ଡୋଜର ଟିକା କିଣା ସରିଥିବାବେଳେ ଜାନୁଆରୀ ୧୪ ସୁଦ୍ଧା ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଂଚଳକୁ ଶତ ପ୍ରତିଶତ ଟିକା ଯୋଗାଣ କରାଯିବ ବୋଲି କେନ୍ଦ୍ର ସରକାର ପ୍ରକାଶ କରିଛନ୍ତି ।
