ତନ୍ତ୍ର ବିଦ୍ୟା ପାଇଁ ମା’କୁ ଜୀଅନ୍ତା ଜାଳିଦେଲା ପୁଅ
ତନ୍ତ୍ର ବିଦ୍ୟା ପାଇଁ ମା’କୁ ଜୀଅନ୍ତା ଜାଳିଦେଲା ପୁଅ
admin
2847
କୋଲକାତା: ପଶ୍ଚିମବଙ୍ଗ ରାଜଧାନୀ କୋଲକାତାରେ ଏକ ହୃଦୟବିଦାରକ ଘଟଣା ସମ୍ମୁଖକୁ ଆସିଛି । ଜଣେ ମହିଳା ନିଜ ୨୫ ବର୍ଷୀୟ ପୁଅକୁ ଅତି ନିର୍ମମ ଭାବେ ହତ୍ୟା କରି ଘିଅ, କର୍ପୂର ଏବଂ ମସଲା ସହ ଜାଳି ଦେଇଛି । ଶରୀରର ହାଡ଼କୁ ଘରର ଛାତ ଉପରେ ପକାଇ ଦେଇଛି । ତନ୍ତ୍ରବିଦ୍ୟା ଚକ୍କରରେ ମହିଳା ଜଣକ ଏଭଳି ଜଘନ୍ୟ କାଣ୍ଡ କରିଥିବା ପୁଲିସ କହିଛି । ତେବେ ଫରେନସିକ ରିପୋର୍ଟକୁ ଅପେକ୍ଷା କରାଯାଇଛି । ସୂଚନା ଅନୁସାରେ, ଅଭିଯୁକ୍ତ ମହିଳାଙ୍କ ନାମ ଗୀତା ମାହେନ ସରିୟା । ପତିଙ୍କ ସହ ବିବାଦ ହେତୁ କିଛି ବର୍ଷ ହେଲା ତିନି ପିଲାଙ୍କୁ ନେଇ ବାପ ଘରେ ଅଲଗା ରହି ଆସୁଛନ୍ତି । ବଡ଼ ପୁଅ ଅର୍ଜୁନ (୨୫) ସହ କିଛି ଦିନ ହେଲା ସମ୍ପର୍କ କରି ନ ପାରିବାରୁ ପିତା ଅନୀଲ ଥାନାରେ ନିଖୋଜ ରିପୋର୍ଟ ପରେ ଏହି ଘଟଣା ପ୍ରକାଶ୍ୟକୁ ଆସିଛି । ଅନୀଲଙ୍କ ଅଭିଯୋଗକୁ ଭିତ୍ତି କରି ବିଧାନନଗର ଇଷ୍ଟ ଥାନା ପୁଲିସ ଏ ଜେ ବ୍ଲକରେ ଥିବା ଦୁଇ ମହଲା କୋଠାର ଛାତ ଉପରୁ ତଉଲିଆରେ ଗୁଡ଼ା ହୋଇ ରଖାଯାଇଥିବା ଜଣେ ପୁରୁଷର ଅଧାଜଳା ହାଡ ଜବତ କରିଛି । ଘଟଣା ସ୍ଥଳରୁ ଏକ ବଡ଼ କଡେ଼ଇ, ପାଉଁଶ ଏବଂ ହତ୍ୟାକାଣ୍ଡରେ ବ୍ୟବହୃତ ଏକ ପଥର ଜବତ ହୋଇଛି । ଅଭିଯୁକ୍ତ ଗୀତା ଏବଂ ତାଙ୍କ ସାନ ପୁଅ ବିଦୁର (୨୨) କୁ ଗିରଫ କରି ପଚରା ଉଚରା କରାଯିବାରୁ ଗୀତା ନିଜ ଅପରାଧ ସ୍ୱୀକାର କରିଛି । ମୃତଦେହକୁ ପୋଡ଼ିବା ବେଳେ ସେଥିରୁ ନିର୍ଗତ ଗନ୍ଧକୁ କମ କରିବା ପାଇଁ ସେ ଘିଅ, କର୍ପୁର ଏବଂ ମସଲା ବ୍ୟବହାର କରିଥିଲା । ଉଭୟ ଅଭିଯୁକ୍ତଙ୍କୁ କୋର୍ଟରେ ହାଜର କରାଯାଇଥିଲା । ଅଭିଯୁକ୍ତଙ୍କ ମାନସିକ ସ୍ଥିତି ପରୀକ୍ଷା କରିବା ପାଇଁ କୋର୍ଟ ଆଦେଶ ଦେଇଛନ୍ତି ।
