ଦିଲ୍ଲୀରେ ୫୦୦ ସୁରକ୍ଷା କର୍ମୀଙ୍କୁ କରୋନା ପଜିଟିଭ
ଦିଲ୍ଲୀରେ ୫୦୦ ସୁରକ୍ଷା କର୍ମୀଙ୍କୁ କରୋନା ପଜିଟିଭ
admin
6089
ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ କରୋନା ଏହାର କାୟା ମେଲାଇ ଚାଲିଛି । ଦିଲ୍ଲୀରେ ନିୟୋଜିତ ଥିବା ୫୦୦ ରୁ ଊର୍ଦ୍ଧ୍ୱ ସୁରକ୍ଷାକର୍ମୀ କରୋନା ପଜିଟିଭ ଚିହ୍ନଟ ହୋଇଛନ୍ତି । କେନ୍ଦ୍ର, ଦକ୍ଷିଣ ଏବଂ ଉତ୍ତର ଦିଲ୍ଲୀରେ ମୁତୟନ ଥିବା ଅଧିକ ସଂଖ୍ୟକ ସୁରକ୍ଷାକର୍ମୀମାନେ ଏହି ଭାଇରସରେ ଆକ୍ରାନ୍ତ ହୋଇଥିବା ଜଣାପଡ଼ିଛି । କରୋନା ସଂକ୍ରମିତ ହୋଇଥିବା ସୁରକ୍ଷାକର୍ମୀମାନଙ୍କ ମଧ୍ୟରେ ଅଧିକାଂଶ ବିଏସଏଫ ଯବାନ ଅଛନ୍ତି । ବର୍ତ୍ତମାନ ସୁଦ୍ଧା ୧୯୫ ଜଣ ବିଏସଏଫଙ୍କ ଶରୀରରେ କରୋନା ଭାଇରସ ଚିହ୍ନଟ କରାଯାଇଛି । ଏମାନଙ୍କ ମଧ୍ୟରୁ ଗୁରୁବାର ୨ ଜଣଙ୍କର ମୃତ୍ୟୁ ହୋଇଛି । ଏ ନେଇ ବିଏସଏଫ ମୁଖ୍ୟାଳୟ ପକ୍ଷରୁ କୁହାଯାଇଛି ଯେ କରୋନା ସଂକ୍ରମିତ ହୋଇଥିବା ୧୯୫ ବିଏସଏଫଙ୍କ ମଧ୍ୟରୁ ୧୩୧ ଜଣ ଦିଲ୍ଲୀ ପୁଲିସ ସହ ଡ୍ୟୁଟି କରୁଥିବା ବେଳେ ସଂକ୍ରମଣର ଶିକାର ହୋଇଥିଲେ । ୧୯୫ ଜଣଙ୍କ ମଧ୍ୟରୁ ୨ ଜଣଙ୍କର ମୃତ୍ୟୁ ହୋଇଥିବା ବେଳେ ୨ ଜଣ ସୁସ୍ଥ ହୋଇ ଘରକୁ ଫେରିଛନ୍ତି । ୧୯୧ ଜଣ ବିଭିନ୍ନ ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ଅନେକ ସଂଖ୍ୟାରେ ସିଆରପିଏଫ ଯବାନ ମଧ୍ୟ କରୋନା ସଂକ୍ରମିତ ହୋଇଥିବା ଜଣାପଡ଼ିଛି । ବର୍ତ୍ତମାନ ସୁଦ୍ଧା ମୋଟ ୧୫୯ ଜଣ ସିଆରପିଏଫ ଯବାନ ମଧ୍ୟ କରୋନା ଆକ୍ରାନ୍ତ ହୋଇଛନ୍ତି । ଏମାନଙ୍କ ମଧ୍ୟରୁ ଜଣେ ଡ୍ରାଇଭର ଏବଂ ଅନ୍ୟ ଜଣେ କନଷ୍ଟେବଳ ଭାବେ କାର୍ଯ୍ୟ କରୁଥିଲେ । ସିଆରପିଏଫ ପକ୍ଷରୁ ଏ ନେଇ କୋଭିଡ-୧୯ ସେଲ ମଧ୍ୟ ଗଠନ କରାଯାଇଛି । କରୋନା ସଂକ୍ରମିତ ହୋଇଥିବା ଅନ୍ୟ ସୁରକ୍ଷା କର୍ମୀ ଙ୍କ ମଧ୍ୟରୁ ଆଇଟିବିପିର ୮୨ ଜଣ, ଦିଲ୍ଲୀ ପୁଲିସର ୮୦ ଜଣ, ସିଆଇଏସଏଫର ୫୦ ଜଣ ଏବଂ ଏସଏସବିର ୧୪ ଜଣ ରହିଛନ୍ତି ।
