ନିର୍ବାଚନ ତାରିଖ ଘୋଷଣା ପୂର୍ବରୁ ୪ ବିଧାୟକ ପ୍ରାର୍ଥୀଙ୍କୁ ଟଙ୍କା ଦେଇଛି ବିଜେଡ଼ି
ନିର୍ବାଚନ ତାରିଖ ଘୋଷଣା ପୂର୍ବରୁ ୪ ବିଧାୟକ ପ୍ରାର୍ଥୀଙ୍କୁ ଟଙ୍କା ଦେଇଛି ବିଜେଡ଼ି
admin
5636
ଭୁବନେଶ୍ୱର : ନିର୍ବାଚନ ତାରିଖ ମାର୍ଚ୍ଚ ୧୦ରେ ଘୋଷଣା ହେଲା । ହେଲେ ବିଜୁ ଜନତା ଦଳ ଏହା ପୂର୍ବରୁ ୪ ଜଣଙ୍କୁ ଟଙ୍କା ଦେଇଛି । ଏକଥା ଆମେ କହୁନାହୁଁ । ନିର୍ବାଚନ କମିଶନଙ୍କ ନିକଟରେ ବ୍ୟୟ ସଂକ୍ରାନ୍ତୀୟ ସତ୍ୟପାଠ ଦାଖଲରେ ବିଜେଡ଼ି ପକ୍ଷରୁୁ ଏହା ଦର୍ଶାଯାଇଛି । ଉକ୍ତ ସତ୍ୟପାଠ ଅନୁଯାୟୀ ଦଳ ଫେବୃଆରୀ ୧୪ରେ ମହାକାଳପଡ଼ା ପ୍ରାର୍ଥୀ ଅତନୁ ସବ୍ୟସାଚୀ ନାୟକ, ସୁକିନ୍ଦା ପ୍ରାର୍ଥୀ ପ୍ରୀତିରଂଜନ ଘଡ଼େଇ, ବଡ଼ଚଣା ପ୍ରାର୍ଥୀ ଅମର ପ୍ରସାଦ ଶତପଥୀ ଓ ପାଟକୁରା ପ୍ରାର୍ଥୀ ବେଦପ୍ରକାଶ ଅଗ୍ରୱାଲଙ୍କୁ ଦଳ ୨୦ ଲକ୍ଷ ଟଙ୍କା ପ୍ରଦାନ କରିଥିଲା । ଯାହାକି ବିଜେଡ଼ିକୁ ଅକଳରେ ପକାଇବ ବୋଲି କୁହାଯାଉଛି । ତେବେ ଏନେଇ ଦଳ ସାନି ସତ୍ୟପାଠ ଦାଖଲ କରିବା ସହ ଏହା ଟାଇପ ଜନିତ ତ୍ରୁଟି ବୋଲି କମିଶନଙ୍କୁ ଅବଗତ କରିବ ବୋଲି ଜାଣିବାକୁ ମିଳିଛି । ସୂଚନାଯୋଗ୍ୟଯେ, ଅତୀତରେ ଏହି ବ୍ୟୟ ସଂକ୍ରାନ୍ତୀୟ ସତ୍ୟପାଠ ରିପୋର୍ଟକୁ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅକଳରେ ପଡ଼ିଯାଇଥିଲେ । ଏହାକୁ ନେଇ ହାଇକୋର୍ଟରେ ମାମଲା ମଧ୍ୟ ହୋଇଥିଲା ।
ନିର୍ବାଚନରେ ଦଳୀୟ ପ୍ରାର୍ଥୀମାନେ କେତେ ଟଙ୍କା ଖର୍ଚ୍ଚ କରନ୍ତି ତାହା ପ୍ରତ୍ୟେକ ଲୋକ ଅବଗତ । କିନ୍ତୁ ନିର୍ବାଚନ କମିଶନ ବିଧାୟକ ପ୍ରାର୍ଥୀଙ୍କ ପାଇଁ ନିର୍ବାଚନୀ ଖର୍ଚ୍ଚ ସୀମା ମାତ୍ର ୨୦ ଲକ୍ଷ ଓ ସାଂସଦ ପ୍ରାର୍ଥୀଙ୍କ ପାଇଁ ୮୦ ଲକ୍ଷ ଟଙ୍କା ଧାର୍ଯ୍ୟ କରାଯାଇଛି । ଏହାର ଦଶ କୋଡ଼ିଏ ଗୁଣା ଖର୍ଚ୍ଚ ହେଉଥିବାରୁ ସତ୍ୟପାଠ ଦାଖଲ ବେଳେ ପ୍ରାର୍ଥୀମାନେ ଆବଶ୍ୟକତା ଠାରୁ ଅଧିକ ଯତ୍ନବାନ ହେଉଛନ୍ତି । ଯେଉଁଥିପାଇଁ ଖର୍ଚ୍ଚକୁ ଅତି ନଗଣ୍ୟ ଦର୍ଶାଯାଉଛି । ବିଜେଡ଼ିର କେତେକ ବିଧାୟକ ୨୦ ଲକ୍ଷରୁ ବହୁ କମ ଅର୍ଥ ନିର୍ବାଚନରେ ଖର୍ଚ୍ଚ କରିଥିବା ଦର୍ଶାଇଛନ୍ତି । ଅନ୍ୟ ଦଳର ବହୁ ବିଧାୟକ ମଧ୍ୟ ଏଭଳି ଦର୍ଶାଇଛନ୍ତି । ମନ୍ତ୍ରୀ ସମୀର ରଂଜନ ଦାସ, ଯାଜପୁର ବିଧାୟକ ପ୍ରଣବ ପ୍ରକାଶ ଦାସ, ପିପିଲି ବିଧାୟକ ପ୍ରଦୀପ ମହାରଥୀ, ମହାକାଳପଡ଼ା ବିଧାୟକ ଅତନୁ ସବ୍ୟସାଚୀ ନାୟକ ପ୍ରମୁଖ ଦଳର ୨୦ ଲକ୍ଷ ଟଙ୍କା ଖର୍ଚ୍ଚ କରିନପାରି ଫେରାଇଥିବା ଜାଣିବାକୁ ମିଳିଛି ।
