ରୋଗୀ ଓ ସହାୟକଙ୍କ ପାଇଁ ମାଗଣା ବସ୍ ସେବା
ରୋଗୀ ଓ ସହାୟକଙ୍କ ପାଇଁ ମାଗଣା ବସ୍ ସେବା
admin
2892
ଭୁବନେଶ୍ୱର : ମାଲକାନଗିରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ମାଗଣାରେ ଯିବା ଆସିବା ପାଇଁ ରୋଗୀ ଓ ସେମାନଙ୍କ ସହାୟକମାନଙ୍କ ନିମନ୍ତେ ୨ଟି ଓଡ଼ିଶା ରାଜ୍ୟ ସଡ଼କ ପରିବହନ ନିଗମ (ଓଏସ୍ଆରଟିସି) ବସ୍ ସେବା ଆସନ୍ତାକାଲି (ଶନିବାର)ଠାରୁ ଉପଲବ୍ଧ ହେବ । ଅପହଞ୍ଚ ଅଞ୍ଚଳର ଲୋକମାନଙ୍କୁ ଉତ୍ତମ ସ୍ୱାସ୍ଥ୍ୟସେବା ଓ ଗମନାଗମନର ସହଜ ମାଧ୍ୟମ ଯୋଗାଇଦେବା ଉଦେ୍ଧଶ୍ୟରେ ଓଏସ୍ଆରଟିସି ପକ୍ଷରୁ ଏହି ବସ୍ ସେବା ଯୋଗାଇ ଦିଆଯାଉଛି । ପ୍ରଥମ ବସ୍ଟି ସକାଳ ସାଢେ଼ ୬ଟାରୁ ଜନତାପାଇଠାରୁ ବାହାରି ଯାନବାଇ ଚିତ୍ରକୋଣ୍ଡା, ବାଲିମେଳା ହୋଇ ଜିଲ୍ଲା ମୁଖ୍ୟ ଚିକିତ୍ସାଳୟରେ ପୂର୍ବାହ୍ନ ୧୦ଟାରେ ପହଞ୍ଚିବ । ସେହିପରି ଅପରାହ୍ନ ୪ଟାରେ ମାଲକାନଗିରିରୁ ବାହାରି ଉକ୍ତ ମାର୍ଗ ଦେଇ ପ୍ରତ୍ୟାବର୍ତ୍ତନ କରି ଜନତାପାଇରେ ସଂଧ୍ୟା ସାଢେ଼ ୭ଟାରେ ପହଞ୍ଚିବ ।
ଅନ୍ୟ ବସ୍ଟି ସକାଳ ସାଢେ଼ ୬ଟାରେ ମୋଟୁଠାରୁ ବାହାରି ଏମ୍.ଭି-୭୯, କାଲିମେଳା, ପଟେରୁ ହୋଇ ଜିଲ୍ଲା ମୁଖ୍ୟ ଚିକିତ୍ସାଳୟରେ ଦିନ ୧୦ଟାରେ ପହଞ୍ଚିବ ଏବଂ ସେଠାରୁ ଅପରାହ୍ନ ୪ଟାରେ ପ୍ରତ୍ୟାବର୍ତ୍ତନ କରି ରାତି ସାଢେ଼ ୭ଟାରେ ମୋଟୁରେ ପହଞ୍ଚିବ । ମାଲକାନଗିରିର ଦୁର୍ଗମ ଅଞ୍ଚଳରେ ରହୁଥିବା ଲୋକମାନେ ଏହା ଦ୍ୱାରା ଚିକିତ୍ସା ସେବା ପାଇବା ସହ ବହୁଳ ଭାବେ ଉପକୃତ ହେବେ ବୋଲି ବାଣିଜ୍ୟ ଓ ପରିବହନ ବିଭାଗ ଆଶା ପ୍ରକାଶ କରିଛି ।
