ସରକାରୀ ଚାକିରିଆଙ୍କ ପାଇଁ ନବୀନ ସରକାରଙ୍କ ବଡ଼ ନିଷ୍ପତ୍ତି
admin
ଭୁବନେଶ୍ୱର: ଇଲେକ୍ଟ୍ରିଚାଳିତ ମୋଟର ଯାନ ଚଳପ୍ରଚଳକୁ ପ୍ରୋତ୍ସାହିତ କରିବା ନିମନ୍ତେ ରାଜ୍ୟ ସରକାର ନିଜର କର୍ମଚାରୀମାନଙ୍କୁ ୨ରୁ ୧୫ଲକ୍ଷ ଟଙ୍କା ପର୍ୟ୍ୟନ୍ତ ସୁଧମୁକ୍ତ ଅଗ୍ରୀମ ଅର୍ଥ ଦେବାକୁ ନିଷ୍ପତ୍ତି ନେଇଛନ୍ତି । ତେବେ ପ୍ରଥମ ଓ ଦ୍ୱିତୀୟ ଶ୍ରେଣୀ କର୍ମଚାରୀଙ୍କୁ ୧୫ଲକ୍ଷ ଟଙ୍କା ପର୍ୟ୍ୟନ୍ତ ଏବଂ ତୃତୀୟ ଓ ଚତୁର୍ଥ ଶ୍ରେଣୀ କର୍ମଚାରୀଙ୍କୁ ୨ଲକ୍ଷ ଟଙ୍କା ପର୍ୟ୍ୟନ୍ତ ଆଡଭାନ୍ସ ଆକାରରେ ନେଇପାରିବେ । ୨୦୨୫ ଡିସେମ୍ବର ୩୧ତାରିଖ ପର୍ୟ୍ୟନ୍ତ କର୍ମଚାରୀମାନେ ଗାଡ଼ି କିଣିବା ପାଇଁ ଏହି ଆଡଭାନ୍ସ ନେଇପାରିବେ । ତେବେ ତୃତୀୟ ଓ ଚତୁର୍ଥ ଶ୍ରେଣୀ କର୍ମଚାରୀଙ୍କ ପାଇଁ ଆଡ଼ଭାନ୍ସ ପରିମାଣ ମାତ୍ର ୨ଲକ୍ଷ ଟଙ୍କା ପର୍ୟ୍ୟନ୍ତ ସ୍ଥିରୀକୃତ ହୋଇଥିବାରୁ ତାକୁ ନେଇ ଅସନ୍ତୋଷ ଦେଖାଦେଇଛି ।ଏନେଇ ଅର୍ଥ ବିଭାଗ ପକ୍ଷରୁ ପ୍ରକାଶିତ ବିଜ୍ଞପ୍ତି, ରାଜ୍ୟର ପ୍ରଥମ ଓ ଦ୍ୱିତୀୟ ଶ୍ରେଣୀ କର୍ମଚାରୀଙ୍କୁ ଇଲେକ୍ଟ୍ରିଚାଳିତ ମୋଟର ଯାନ କ୍ରୟ ନିମନ୍ତେ ସୁଧମୁକ୍ତ ଅଗ୍ରୀମ ରାଜ୍ୟ ସରକାର ଯୋଗାଇ ଦେବେ । ଗାଡ଼ିର ଏକ୍ସ-ଶୋରୁମ୍ ଦରର ୭୫% ଅବା ସର୍ବାଧିକ ୧୫ଲକ୍ଷ ଟଙ୍କା ପର୍ୟ୍ୟନ୍ତ ଅଗ୍ରୀମ ଯୋଗାଇ ଦିଆଯିବ ।ସେହିପରି ତୃତୀୟ ଓ ଚତୁର୍ଥ ଶ୍ରେଣୀ କର୍ମଚାରୀଙ୍କୁ ବିଦ୍ୟୁତଚାଳିତ ସ୍କୁଟର, ସ୍କୁଟି କ୍ରୟ କରିବା ନିମନ୍ତେ ଗାଡ଼ିର ଏକ୍ସ-ଶୋରୁମ୍ ଦରର ୭୫% ଅବା ସର୍ବାଧିକ ୨ଲକ୍ଷ ଟଙ୍କା ପର୍ୟ୍ୟନ୍ତ ସୁଧମୁକ୍ତ ଅଗ୍ରୀମ ଯୋଗାଇ ଦିଆଯିବ ।ଯେଉଁ କର୍ମଚାରୀମାନେ ଏହି ଆଡଭାନ୍ସ ନେବେ ସେମାନେ ଗାଡ଼ି କ୍ରୟ କରିବାର ୩ମାସ ମଧ୍ୟରେ ଗାଡ଼ିର ପଞ୍ଜିକରଣ ସାର୍ଟଫିକେଟ, ବୀମା ଓ ରିଟେଲ ଇନଭଏସ୍ ନିଜର କର୍ତ୍ତୃପକ୍ଷଙ୍କ ନିକଟରେ ଦାଖଲ କରିବେ । ଯେଉଁ କର୍ମଚାରୀ ଉଭୟ ୪ଚକିଆ ଓ ୨ଚକିଆ ଗାଡ଼ି ନିମନ୍ତେ ଆଡ଼ଭାନ୍ସ ନେବା ପାଇଁ ଯୋଗ୍ୟ ସେମାନେ ଗୋଟିଏ ସମୟରେ ଗୋଟିଏ ଗାଡ଼ି ପାଇଁ ଏହି ଅର୍ଥ ନେଇପାରିବେ । ଯଦି ଏହି ଆଡଭାନ୍ସ ଅର୍ଥକୁ ଗାଡ଼ି କ୍ରୟ ବଦଳରେ ଅନ୍ୟ କୌଣସି କାର୍ୟ୍ୟ ପାଇଁ ଉପଯୋଗ କରାଯାଏ ତେବେ ସମ୍ପୃକ୍ତ କର୍ମଚାରୀଙ୍କ ବିରୁଦ୍ଧରେ ଶୃଙ୍ଖଳାଗତ କାର୍ୟ୍ୟାନୁଷ୍ଠାନ ଗ୍ରହଣ କରାଯିବ ଓ ତାଙ୍କୁ ନେଇଥିବା ଆଡ଼ଭାନ୍ସ ଫେରସ୍ତ କରିବାକୁ ପଡ଼ିବ ।
