ସ୍ୱାଧୀନତା ପରେ ପ୍ରଥମ : କ୍ୟାବିନେଟରେ ନାହାନ୍ତି ଜଣେ ବି ମୁସଲିମ ସଦସ୍ୟ
ସ୍ୱାଧୀନତା ପରେ ପ୍ରଥମ : କ୍ୟାବିନେଟରେ ନାହାନ୍ତି ଜଣେ ବି ମୁସଲିମ ସଦସ୍ୟ
admin
2509
ପାଟନା : ବିହାର ବିଧାନସଭା ନିର୍ବାଚନ ଫଳାଫଳ ଆସିବା ସହିତ ନୀତିଶ କୁମାର ସପ୍ତମ ଥର ପାଇଁ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି । ତେବେ ନୀତିଶଙ୍କ କ୍ୟାବିନେଟରେ ଜଣେ ମଧ୍ୟ ମୁସଲିମ ମନ୍ତ୍ରୀ ନାହାନ୍ତି । ଏପରିକି ଏନଡିଏ ମେଣ୍ଟରେ ଜଣେ ହେଲେ ମୁସଲିମ ବିଧାୟକ ନାହାନ୍ତି । ସ୍ୱାଧୀନତା ପରବର୍ତ୍ତୀ ସମୟରେ ଏହା ପ୍ରଥମ ଥର ହେବାକୁ ଯାଉଛି । ପ୍ରଥମ ଥର ପାଇଁ କୌଣସି କ୍ୟାବିନେଟରେ ଜଣେ ହେଲେ ମୁସଲିମ ସଦସ୍ୟ ନାହାନ୍ତି ।
ଏନଡିଏ ମେଣ୍ଟରେ ବିଜେପି, ଜେଡିୟୁ, ହାମ୍ସ ଏବଂ ଭିଆଇପି ରହିଥିବା ବେଳେ କୌଣସି ଦଳରେ ଜଣେ ହେଲେ ମୁସଲିମ ବିଧାୟକ ନାହାନ୍ତି । ବିହାରର ୧୬ ପ୍ରତିଶତ ଜନସଂଖ୍ୟା ମୁସଲିମ ହୋଇଥିବା ବେଳେ ଶାସକ ଦଳରେ ଜଣେ ମଧ୍ୟ ମୁସଲିମ ବିଧାୟକ ନରହିବା ଆଶ୍ଚର୍ଯ୍ୟଜନକ । ଚଳିତ ନିର୍ବାଚନରେ ନୀତିଶ କୁମାରଙ୍କ ଦଳ ପକ୍ଷରୁ ୧୧ ଜଣ ମୁସଲିମ ପ୍ରାର୍ଥୀଙ୍କୁ ଟିକଟ ଦିଆଯାଇଥିଲା । ତେବେ ସମସ୍ତ ପ୍ରାର୍ଥୀ ପରାଜୟ ବରଣ କରିଥିଲେ ।
ନୀତିଶଙ୍କ ସହିତ ୧୪ ଜଣ ବିଧାୟକ କ୍ୟାବିନେଟ ମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ । ଏହା ମଧ୍ୟରେ ଉଚ୍ଚ ଜାତିର ଏବଂ ପଛୁଆ ବର୍ଗର ୪ ଜଣ ଲେଖାଏଁ ବିଧାୟକ ରହିଥିଲେ । ଏହା ବ୍ୟତିତ ଅତି ପଛୁଆ ବର୍ଗର ୩ ଜଣ ଏବଂ ଅନୁସୂଚିତ ବର୍ଗର ୩ ଜଣ ଲେଖାଏଁ ବିଧାୟକ ଶପଥ ଗ୍ରହଣ କରିଥିଲେ । କ୍ୟାବିନେଟରେ ସର୍ବାଧିକ ୩୬ ବିଧାୟକଙ୍କୁ ସାମିଲ କରାଯାଇପାରିବ । ନିର୍ମଳ ଭାବମୂର୍ତ୍ତି ରକ୍ଷା କରିବା ଉଦେ୍ଧଶ୍ୟରେ ନୀତିଶ ଭବିଷ୍ୟତରେ ମୁସଲିମ ସମ୍ପ୍ରଦାୟର ଜଣେ ବିଧାୟକଙ୍କୁ କ୍ୟାବିନେଟରେ ସାମିଲ କରିପାରନ୍ତି । ଉଲ୍ଲେଖଯୋଗ୍ୟ ଯେ, ଚଳିତ ନିର୍ବାଚନରେ ଆରଜେଡି ସର୍ବାଧିକ ୭୫ ଆସନରେ ବିଜୟୀ ହୋଇଥିବା ବେଳେ ବିଜେପି ୭୪ଟି ଏବଂ ଜେଡିୟୁ ୪୩ ଆସନରେ ବିଜୟୀ ହୋଇଥିଲେ । ୧୨୫ ଆସନ ସହିତ ଏନଡିଏ ମେଣ୍ଟ ସରକାର ଗଠନ କରିଥିଲେ ।
