ନିଯୁକ୍ତିପତ୍ର ବାଣ୍ଟି ଏହା କହିଲେ ପ୍ରଧାନମନ୍ତ୍ରୀ
admin
ନୂଆଦିଲ୍ଲୀ: ଗୋଟାଏ ବିକଶିତ ଭାରତ ଗଢ଼ିବା ପାଇଁ ଯୁବାମାନଙ୍କ ମେଧା ଓ ଶକ୍ତିକୁ ଉପଯୁକ୍ତ ସୁଯୋଗ ଦେବାକୁ ସରକାର ପ୍ରତିବଦ୍ଧ ବୋଲି ଆଜି ରୋଜଗାର ମେଳା-୨୦୨୩ରେ ନିଯୁକ୍ତିପତ୍ର ବଣ୍ଟନ କରିବା ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି। ଆଜି ଭିଡିଓ କନ୍ଫ୍ରେନ୍ସିଙ୍ଗ୍ ଜରିଆରେ ପ୍ରଧାନମନ୍ତ୍ରୀ ବିଭିନ୍ନ ସରକାରୀ ବିଭାଗ ଓ ପ୍ରତିଷ୍ଠାନ ନିମନ୍ତେ ଚୟନ କରାଯାଇଥିବା ୭୧,୦୦୦ ବ୍ୟକ୍ତିଙ୍କୁ ନିଯୁକ୍ତି ପତ୍ର ବଣ୍ଟନ କରିବା ସହିତ ଉଦ୍ବୋଧନ ଦେଇଥିଲେ।
ପ୍ରଧାନମନ୍ତ୍ରୀ କହିଲେ, ଆଜି ୭୦,୦୦୦ରୁ ଅଧିକ ଯୁବା କର୍ମସଂସ୍ଥାନ ପାଇଛନ୍ତି। ଆପଣମାନଙ୍କ ପରିବାବର୍ଗଙ୍କୁ ଅଭିନନ୍ଦନ। ବିକଶିତ ଭାରତ ପାଇଁ କରାଯାଇଥିବା ଅଭିଳାଷ ପୂରଣ କରିବା ଲାଗି ଆମ ସରକାର ନିରନ୍ତର କାର୍ୟ୍ୟ କରୁଛି ଓ ସରକାରୀ ଚାକିରି ଯୋଗାଇବା ପ୍ରକ୍ରିୟା ତ୍ବରାନ୍ବିତ ହେଉଛି। ଆଜି ସମଗ୍ର ବିଶ୍ବରେ ଭାରତ ସବୁଠୁ ଦ୍ରୁତ ଗତିରେ ଅଗ୍ରସର ହେଉଛି। କୋଭିଡ୍ ପରେ ଅନେକ ଦେଶ ଆର୍ଥିକ ସଙ୍କଟରେ ପଡ଼ିଥିବା ବେଳେ ଭାରତ ଦୃଢ଼ତାର ସହିତ ଆଗେଇ ଚାଲିଛି।
ଆମ ଅର୍ଥନୀତି ହେଉଛି ଦ୍ରୁତ ବୃଦ୍ଧି ପାଉଥିବା ଅର୍ଥନୀତି। ଅର୍ଥନୀତି କ୍ଷୟ ହେଉଥିବା କଥା ବିଶ୍ବ ଦେଖୁଥିବା ବେଳେ ଭାରତର ସ୍ଥିତି ଉଜ୍ଜ୍ବଳ ବୋଲି ସମସ୍ତେ କହୁଛନ୍ତି। ନବ ଭାରତର ଯୁବା ଆଧୁନିକ ପ୍ରଯୁକ୍ତି କ୍ଷେତ୍ରରେ ମଗ୍ନ ରହି ଡ୍ରୋନ୍ ନିର୍ମାଣ କରିବା ସହିତ ଡ୍ରୋନ୍ ପାଇଲଟ୍ ହେଉଛନ୍ତି। ସେ ଆହୁରି ମଧ୍ୟ କହିଛନ୍ତି, ବନ୍ଦର ସେକ୍ଟର୍ ବି ଉନ୍ନତି କରୁଛି। କର୍ମ ସଂସ୍ଥାନ ସୃଷ୍ଟି କରିବାରେ ସ୍ବାସ୍ଥ୍ୟ କ୍ଷେତ୍ର ହେଉଛି ପ୍ରକୃଷ୍ଟ ଉଦାହରଣ। ଦେଖିବାକୁ ଗଲେ, ପ୍ରତ୍ୟେକ ଭିତ୍ତିଭୂମି କର୍ମସଂସ୍ଥାନ ସୁଯୋଗ ସୃଷ୍ଟି କରୁଛି।
