ଢେ଼ଙ୍କାନାଳ କୋଭିଡ ହସ୍ପିଟାଲରେ ଅଭାବନୀୟ କାଣ୍ଡ, ସାଲାଇନ ପାଇପ ଲଗାଇ ବୃଦ୍ଧାଙ୍କ ଆତ୍ମହତ୍ୟା
ଢେ଼ଙ୍କାନାଳ କୋଭିଡ ହସ୍ପିଟାଲରେ ଅଭାବନୀୟ କାଣ୍ଡ, ସାଲାଇନ ପାଇପ ଲଗାଇ ବୃଦ୍ଧାଙ୍କ ଆତ୍ମହତ୍ୟା
admin
4749
ଢେ଼ଙ୍କାନାଳ: ଢେ଼ଙ୍କାନାଳ କୋଭିଡ ହସ୍ପିଟାଲରେ ମଧ୍ୟାହ୍ନରେ ଏକ ଅଭାବନୀୟ ଘଟଣା ଘଟିଛି । ହସ୍ପିଟାଲର ଏକ କୋଠରୀରେ ଚିକିତ୍ସାଧୀନ ଜଣେ କରୋନା ଆକ୍ରାନ୍ତ ବୃଦ୍ଧା ସାଲାଇନ ପାଇପ ଦ୍ୱାରା ସିଲିଂ ଫ୍ୟାନରେ ଝୁଲି ଆତ୍ମହତ୍ୟା କରିଛନ୍ତି । ମୃତକ ଜଣକ ହେଲେ ସଦର ବ୍ଲକ ବିରାଡ଼ିଆ ଗ୍ରାମର ବାସନ୍ତୀ ନାଏକ (୬୦) ବୋଲି ଚିହ୍ନଟ ହୋଇଛି । ଆତ୍ମହତ୍ୟାର କାରଣ ସ୍ପଷ୍ଟ ହୋଇ ନଥିଲେ ହେଁ କରୋନା ଜନିତ ମାନସିକ ଚାପ ହିଁ ସେ ଏହିଭଳି ଚରମ ନିଷ୍ପତ୍ତି ନେଇଥିବା ଅନୁମାନ କରାଯାଉଛି । ସୂଚନା ଅନୁଯାୟୀ କରୋନା ଆକ୍ରାନ୍ତ ଚିହ୍ନଟ ହେବା ପରେ ଗତ ୨୯ ତାରିଖରେ ବାସନ୍ତୀ ଢେ଼ଙ୍କାନାଳ କୋଭିଡ ହସ୍ପିଟାଲରେ ଭର୍ତ୍ତି ହୋଇଥିଲେ । ସେ ରହୁଥିବା କୋଠରୀରେ ଅନ୍ୟ ୪ ଜଣ ରୋଗୀ ମଧ୍ୟ ରହୁଥିଲେ । ଗତ ୩୦ ତାରିଖରେ ପରିବାର ଲୋକ ବାସନ୍ତୀଙ୍କୁ ଭେଟିବାକୁ ଆସିଥିଲେ । ତା ପରଠାରୁ କୌଣସି କାରଣରୁ ବାସନ୍ତୀ ଘୋର ମନସ୍ତାପ ମଧ୍ୟରେ ରହୁଥିଲେ । ମଧ୍ୟାହ୍ନରେ ଡାକ୍ତର ୱାର୍ଡ ପରିକ୍ରମା ଶେଷ କରିବା ପରେ ବାସନ୍ତୀ ହଠାତ ସାଲାଇନ ପାଇପ ସଂଗ୍ରହ କରି ଦଉଡ଼ି ପରି ଏକାଠି କରିଥିଲେ । ପରେ ଅନ୍ୟ ଏକ ଖାଲି କୋଠରୀରେ ସାଲାଇନ ପାଇପ ଦ୍ୱାରା ଫ୍ୟାନରେ ଝୁଲି ପଡ଼ିଥିଲେ । ବାସନ୍ତୀ ଆତ୍ମହତ୍ୟା କରୁଥିବାର ଦେଖି ଜଣେ ରୋଗୀ ସଙ୍ଗେ ସଙ୍ଗେ ଡାକ୍ତରଙ୍କୁ ଖବର ଦେଇଥିଲେ । ଦାୟିତ୍ୱରେ ଥିବା ଡାକ୍ତର ତୁରନ୍ତ ସେଠାରେ ପହଞ୍ଚି ତାଙ୍କୁ ଉଦ୍ଧାର କରି ପ୍ରାରମ୍ଭିକ ଚିକିତ୍ସା କରିଥିଲେ । ତାଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ଢେ଼ଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ବୋଲି କୋଭିଡ ହସ୍ପିଟାଲ ଦାୟିତ୍ୱରେ ଥିବା ଡାକ୍ତର ଏସ.ଏନ ମହାପାତ୍ର ସୂଚନା ଦେଇଛନ୍ତି ।
